Ka kaluar më shumë se gjysma e rrugëtimit për konkurrentët e “Dancing with the stars” dhe ethet e garës që të çojnë drejt kupës së madhe bëhen gjithnjë e më të forta.
Mbrëmja e shtatë në teatrin e kërcimit në Vizion Plus, tejkaloi pritshmëritë. Formula e eliminimeve ndërpreu garën për këngëtaren Mariza Ikonomin.
Ajo nuk u rendit në fund të tabelës së klasifikimit. Ishte Niko Komani ai që numëronte më pak vota nga publiku e që zgjodhi në Dance off Marizën e jo Amosin, të parafundit për nga pikët.
E nga kjo përballje, u largua Mariza Ikonomi, e cila edhe pse mori mbështetjen e tre anëtarëve të tjerë të jurisë, u përzgjodh nga kryetari Ilir Shaqiri që të braktiste garën.
|”Dancing with the stars” kishte paralajmëruar që në nisje të edicionit të shtatë që surprizat do të ishin të shumta, nisur edhe nga formula e eliminimeve me të cilën konkurrentët janë njohur edhe më herët.
Emocionet nuk përfshinë vetëm konkurrentët në Dance off, por të gjithë në “Dancing with the stars”.
Në sfidën për çmimin e madh të premten e ardhshme në teatrin e kërcimit do të ngjiten 8 yjet që kanë mbetur në garë.
