Epidemiologu Artan Simaku ka folur në edicionin qendror të lajmeve në Vizion Plus mbi ecurinë e pandemisë gjatë muajit janar.
Ai e konsideroi të pritshme rritjen e lehtë të numrit të personave të prekur me COVID gjatë këtij muaji.
“Kjo rritje ishte e pritshme. Që në javën e fundit të dhjetorit, ishte parashikuar që në janar do të kishte një rritje të numrit të rasteve për shkak të grumbullimeve për festa. Duhet të kemi parasysh që koronavirusi nuk ka ikur, qarkullon. Ajo që ka rëndësi është respektimi i masave. Kam vërejtur një mosrespektim të masave si nga qytetarët dhe bizneset. Muajt e fundit është vërejtur një prekje e moshave të reja; ka një tendecë të moshave mbi 15-24 dhe 25-30 vjec. Këto mosha e kalojnë më lehtë, por janë faktor i rëndësishëm për përhapjen e COVID.”
Sipas tij, masat kundër koronavirusit duhet të respektohen, pavarësisht procesit të vaksinimit.
“Masat kanë dhënë efekte. Ato duhet të respektohen për gati 95 për qind të popullatës, në mënyrë që ato të japin një efekt më të madh. Epidemia është një përballje e të gjithë shoqërisë. Përballemi të gjithë si shoqëri dhe të gjithë duhet të japin kontributin e tyre në luftën kundër pandemisë. Covid ka zënë vendin e gripit që ka qarkulluar normalisht, në çdo stinë, në të gjithë botën. Në Shqipëri, situata monitorohet ditë pas dite. Vaksinimi është shumë i rëndësishëm dhe është mjeti kryesor i “zhdukjes” së pandemisë. Pavarësisht vaksinimit, masat duhet të zbatohen njësoj.”
