COVID-19 i mori jetën kirurges/ Ademi: Iu shërbeu pacientëve deri në ditët e fundit

Koronavirusi i mori jetën të premten kirurges së njohur shkodrane Zyliha Kraja, bashkëshortja e shkrimtarit dhe dramaturgut, Fadil Kraja.

Përmes një mesazhi të shpërndarë në “Facebook”, kryebashkiakja e Shkodrës, Voltana Ademi shkruan se doktoreshë Zyli i shërbeu pacientëve deri në fund të jetës, pavarësisht se ishte shume vite në pension.

Ademi thekson mes të tjerash se ajo ishte përfaqësuese e mjekëve shkodranë që në kushte të vështira shëruan pacientët e tyre.

“Lamtumirë doktoreshë Zyli! I është dhënë lamtumira e fundit Doktoreshë Zylit, kirurges me zemër të madhe dhe përkushtim të rrallë. Përfaqësuese e brezit të artë të mjekëve shkodranë, që në kushte aspak të lehta, shëruan pacientët e tyre pikë së pari me humanizmin e tyre dhe më pas me profesionalizimin e përkushtimin e spikatur. Doktoreshë Zyli i shërbeu pacientëve deri në ditët e fundit të jetës, edhe pse kishte shumë vite që kishte mbushur moshën e pensionit. Një humbje e madhe për bashkëshortin e saj, dramaturgun e përmasave ndërkombëtare Fadil Kraja, familjen e saj, kolegët, miqtë, Shkodrën dhe të gjithë ata, që falë Doktoreshë Zylit dhe punës së saj, janë sot shendetplotë. Pushofsh në paqe Doktoreshë Zyli! Do të na mungosh të gjithëve”, shkruan Ademi.