Çollaku: Në qershor ishim në prag të konfliktit civil, duhet GJK e pavarur

Anëtari i Kryesisë së PD, Kreshnik Çollaku ka deklaruar se në qershor të vitit 2019 rrezikohej një konflikt civil në vend. Në studion e “Kapital”, Çollaku u shpreh se gjatë zgjedhjeve të 30 qershorit mund të kishte edhe përplasje fizike mes qytetarëve për shkak të situatës së rëndë politike. Sipas tij, kriza politike zgjidhet vetëm nëse kemi një Gjykatë Kushtetuese të pavarur.

“PD ka qenë për një reformë në drejtësi, por për një drejtësi të pavarur dhe jo që të ishte vegël në dorë të Edi Ramës. Lidhur me situatën , alarmin e madh që jep presidenti, duhet të kuptoni që këtu nuk ka një zbutje të opozitës, një ndryshim të mendjes së opozitës. Ne ishim në prag të një konflikti civil në qershor, që nuk do të përfundonte pa përplasje që ishin frymëzuar nga zbulimi i dosjeve ku dilte gjysma e qeverisë në blerje votash. U frenua për shkak të ndërhyrjes së ndërkombëtarëve. Garancia ishte kjo, të mos shkojmë drejt konfliktit, përplasjes sepse këtë çështje do ta zgjidhë Gjykata Kushtetuese. Ekzistenca e një gjukate të pavarur është mundësia e fundit për të zgjidhur krizën politike. Sikur kjo instancë e pavarur humbet çdo mundësi për të zgjidhur krizën politike.”