Kryeministri Edi Rama deklaron se qeveria është e angazhuar për të mos rritur çmimin energjisë elektrike. Pas diskutimeve në kryesinë e PS-së për projektbuxhetin për 2023-in, kreu i qeverisë tha se po bëhen të gjitha përpjekjet që çmimi i energjisë për konsumatorin familjar dhe biznesin të mos ndryshojë, pavarësisht krizës energjetike, si pasojë e konfliktit mes Rusisë dhe Ukrainës.
EDI RAMA
KRYEMINISTER I SHQIPERISE
Patjetër që do vazhdojmë të qëndrojmë me këmbëngulje tek plani për të mbrojtur çmimin e energjisë për familjet dhe për biznesin e vogël. Urojmë që të kemi edhe shiun e nevojshëm pasi dihet që ne jemi shumë të varur nga burimet ujore dhe duke pasur më shumë prurje shiu, kemi më pak nevojë për të dalë në import. Sigurisht do të jetë dimër i vështirë, por masat që kemi marrë dhe mbështetja masive që do vazhdojmë t’i japim të gjitha kategorive, besoj se do ta lehtësojnë dimrin në mënyrë te arsyeshme.
Opozitën e akuzoi se premton vetëm izolim.
EDI RAMA
KRYEMINISTER I SHQIPERISE
Na duhet sigurisht që të jemi sa më të lidhur me partnerët dhe me aleatë të fuqishëm. Dhe sigurisht që do të ishte mirë të kishim një opozitë, e cila të rrinte mirë në këtë kontekst, por për fat të keq kemi një opozitë, e cila premton vetëm izolim nga bota dhe nga ana tjetër është e zhytur në thesin e rublave. Është praktikisht fatkeqësi dhe mënyra sesi vepron në mënyrë të përditshme mbajnë erë dhe ajo çka dimë nuk është e gjitha ajo që duhet ditur.
Përgatitja për vendorët e 2023-it ishte një tjetër çështje e diskutuar. Angazhimi i parë do të jetë me nisjen e një turi në të gjitha bashkitë e vendit në një bashkëbisedime me qytetarët dhe një bilanc të punëve të bëra përgjatë 4 viteve të qeverisjes vendore nga socialistët. Ndalesa e parë do të jetë në qarkun e Gjirokastrës.
