Prej vitesh kjo çadër artistike ka qenë një institucion i Tiranës. Ka vetëm pak kohë që është bërë Cirku Kombëtar, por vizitat jashtë Tiranës, i ka thuajse të pamundura, ndërsa bashkëpunimet më të mira i ka me shkollat dhe qendrën kulturore të Tiranës. Por, këto nuk mjaftojnë. Megjithatë përtej gjithë vështirësive, edhe artistët e këtij institucioni kanë nisur provat për sezonin e ri. Drejtorin Kujtim Dumi, një akrobat që është rritur në këtë çadër e gjejmë, aty me artistët, me një aparat fotografik, për të paralajmëruar publikun se shfaqje të reja po përgatiten këtë sezon. Ashtu sikurse edhe vitin e shkuar, Kujtim Dumi ka vendosur që ta vijojë projektin Guidë me nxënësit e shkollave të Tiranës, por ndryshe nga sa vitin e shkuar në këtë konkurs artistik do të garojnë të rinjtë e gjimnazeve. Nuk do të mungojnë këtë sezon shfaqja më e mirë e sezonit të shkuar dhe numrat më të mirë që do ta përshëndesin publikun me një shfaqje speciale në fundvit.
Cirku nis sezonin mes vështirësive
