Në një konference të përbashkët shtypi në Shtëpinë e Bardhë me Kryeministrin grek Alexis Tsipras, Presidenti Donald Trump përshëndeti rimëkëmbjen ekonomike të Greqisë dhe vuri në dukje “mundësi të mëdha” për investime në Greqi.
Trump vlerësoi Greqinë për shpenzimet e saj në fushën e mbrojtjes si anëtare e NATO-s dhe tha se Shtetet e Bashkuara do t’i shesin Athinës avionë luftarakë F-16, me një vlerë prej 2.4 miliardë dollarësh.
“Patëm një takim shumë të frytshëm me kryeministrin Tsipras, ku diskutuam për mbrojtjen, energjinë, ekonominë dhe tregtinë. Greqia ka kaluar një periudhë të vështirë, por ka bërë një punë fantastike për të përparuar. Ne kemi një marrëdhënie të vjetër me Greqinë”. Ata kanë qenë miq të vërtetë dhe aleatë të besueshëm.”
Tsipras, nga ana e tij, e përshkroi SHBA si një partner strategjik, duke shtuar se marrëdhëniet dypalëshe ishin aktualisht më të mirat që nga përfundimi i Luftës së Dytë Botërore.
I pyetur nga një gazetar per qëndrimin kundër Trump para se ai të zgjidhej president, duke e quajtur një perspektivë “të keqe”, Tsipras i beri bisht përgjigjes së drejtpërdrejte.
“Dua të konfirmoj se takimi ishte shumë poduktiv dhe nuk u ndjeva i kërcënuar. Shoh se ka mundësi që të kapërcejmë diferencat që kemi dhe të gjejmë terren të përbashkët.”.
Tsipras u takua edhe me kreun e Fondit Monetar Ndërkombëtar Christine Lagarde.
Kryeministri grek tha se shpresonte që FMN do të luante një rol vendimtar në diskutimet mbi lehtësimin e borxheve greke.
