Në kulmin e debatit për organizimin dhe shtyrjen e mundshme të zgjedhjeve parlamentare të 18 qershorit, krerët e dy partive kryesore të koalicionit qeverisës, kryeministri Edi Rama dhe kreu i Kuvendit Ilir Meta, kanë darkuar mbrëmjen e së dielës në një restorant peshku pranë “Pazarit të Ri” në Tiranë.
Pjesë e tryezës ishin dhe kryebashkiaku Erion Veliaj dhe Ministri i Drejtësisë, Petrit Vasili. Mësohet se mes Ramës dhe Metës ka patur një dakordësi dhe mirëkuptim për gjithë problematiken e diskutuar në takim.
Pjesë e rëndësishme e bisedës ishte vijimi i bashkëpunimit politik mes PS-së dhe LSI-së për një mandat të dytë qeverisës. Pas kësaj darke, nuk pati asnjë prononcim zyrtar nga krerët e dy partive, por mësohet se parimisht është rënë dakord për të trajtuar çështjen e bashkëpunimit politik edhe për katër vitet e ardhshme.
Takimi vjen edhe në prag të zgjedhjeve të parakohshme në Kavajë. Edhe pse më parë LSI është shprehur se nuk do të jetë pjesë e kësaj gare, zyrtarisht ka depozituar në KQZ emrin e anëtarit të saj në KZAZ-në e kësaj njësie administrative.
Luan Rama tha se ky hap u ndërmor për të mos u bërë pengesë e administrimit, por kjo nuk do të thotë se LSI është pjesë e zgjedhjeve.
Nënkryetari i LSI-së nuk pranoi të fliste për një marrëveshje bashkëpunimi të LSI-së me PS-në për 4 vitet e ardhshme. Por theksoi se vendimi do merret nga strukturat partiake.
Ndërkohë, kreu i LSI Meta ne nje takim me të rinjtë e njësisë 1 ne Tiranë, tha se zgjedhjet duhet të bëhen të lira dhe sipas standardeve.
Në mbledhjen e fundit të Asamblesë Kombëtare të PS-së, kryeministri Rama deklaroi se PS mbetet e hapur për të vijuar bashkëpunimin me LSI. Ndërkohë që ende nuk ka një prononcim zyrtar nga aleatja kryesore.
