Real Madrid po përgatitet për sfidën e kthimit në çerekfinalet e UEFA Champions League, që do të zhvillohet të mërkurën ndaj Arsenalit.
Klubi madrilen ndodhet në një situatë tejet të vështirë pas humbjes 3-0 në ndeshjen e parë në “Emirates Stadium”, një rezultat që ka vendosur “Topçinjtë” me njërën këmbë në gjysmëfinale.
Në ndeshjen e parë, skuadra e Mikel Artetës dominoi totalisht, me Declan Rice që shkëlqeu si heroi i mbrëmjes. Kjo disfatë ka rritur ndjeshëm tensionin në radhët e “Los Blancos”, dhe kjo është reflektuar edhe në stërvitje.
Sipas gazetarit Edu Aguirre, në emisionin “El Chiringuito de Jugones”, ka pasur një konflikt të ashpër mes Jude Bellingham dhe Antonio Rüdiger gjatë stërvitjes të së premtes. “Ka qenë një përplasje verbale shumë e tensionuar. Shkak u bë një provokim gjatë një loje stërvitore, që solli fyerje dhe konfrontim fizik, derisa ndërhynë bashkëlojtarët për t’i ndarë,” raportoi Aguirre.
Fatmirësisht, situata nuk u përshkallëzua dhe në fund dy lojtarët u pajtuan me një shtrëngim duarsh. Megjithatë, ky episod është një tregues i qartë i presionit dhe ngarkesës emocionale që po përjeton skuadra.
Tensioni ka qenë i pranishëm edhe në ndeshjen e fundit të La Liga-s kundër Alavés, ku Kylian Mbappé u përjashtua me karton të kuq pas një ndërhyrjeje të ashpër ndaj Antonio Blanco-s në minutën e 38-të. Fillimisht ai u ndëshkua me të verdhë, por pas ndërhyrjes së VAR-it, gjyqtari ndryshoi vendimin në të kuq direkt.
Sipas “AS”, Mbappé ka kërkuar falje në dhomat e zhveshjes si ndaj shokëve të skuadrës ashtu edhe ndaj arbitrit, duke sqaruar se kishte reaguar nga frustrimi, pasi kishte qenë vetë viktimë e dy faulleve të rënda më herët.
Ndërkohë, në kampionat, Real Madridi është katër pikë pas Barcelonës dhe ndodhet nën presion për të mos humbur terren.
Ndeshja e së mërkurës ndaj Arsenalit është vendimtare dhe përtej vështirësisë së rezultatit, do të kërkohet një mrekulli në “Santiago Bernabéu” për të përmbysur 0-3 dhe për të mbajtur gjallë shpresat për trofeun më të rëndësishëm në Europë.
