Komisioneri Shtetëror për Zgjedhjet, Ilirjan Celibashi përshkroi hap pas hapi se çfarë duhet të bëjnë emigrantët për të votuar në 25 prill.
Nga studioja e “Quo Vadis”, ai shpjegoi se gjithçka nis me shprehjen e interesit dhe deklarimin e vendbanimit të përhershëm që ka jashtë Shqipërisë.
“Kodi Zgjedhor ka përcaktuar procedurën si e përfiton ti të drejtën për të votuar, më së pari do të duhet të jesh i regjistruar dhe të kesh deklaruar vendbanimin. KQZ në rastin konkret ta sjell fletën e votimit atje ku banon. Emigrantët do të duhet të kenë bërë me dije vendbanimin e tyre të përhershëm. Një qytetar që ka vendbanimin e përhershëm në Itali apo Greqi apo kudo tjetër, do të duhej ta kishte deklaruar këtë gjë në regjistrin e Gjendjes Civile. Ky është një proces që vazhdon dhe nuk ka asnjë pengesë që ta bëjë këtë gjë. Bazuar në këtë, ne do të ndërtojmë listën e atyre që do të duan të votojnë. Për këtë po punojmë, që të përcaktojmë të gjitha rregullat duke filluar nga momenti i regjistrimit si votues emigrant, deri në finalizimin e procesit të votimit e numërimin e votës. Momenti fillestar është shprehja e dëshirës për të votuar. E-Albania është një platform për emigrantët për t’u regjistruar sit ë tillë ose për të evidentuar faktin që janë jashtë Shqipërisë, por nuk ka të bëjë aspak me hartimin e listës së votuesve jashtë Shqipërisë. Ne po punojmë për platformën ku do të regjistrohen votuesit.”
