Çfarë arriti Rusia nga sulmet në Siri

Me urdhër të papritur të presidentit Vladimir Putin, Rusia nisi tërheqjen e pjesshme të trupave dhe avionëve ushtarak nga Siria. Zyrtarisht kreu i Kremlinit pohoi se Moska zyrtare i arriti objektivat e saj dhe tashmë i takon bisedimeve të paqes në Gjenevë për të zgjidhur konfliktin pesëvjeçar në Siri. Por cilat ishin qëllimet e Rusisë që u përfshi në këtë luftë? Në një analizë të saj, “BBC” thekson se Rusia arriti të forcojë sërish pozitat e Assadit si President i vendit, duke rikthyer nën kontrollin e tij 10 mijë kilometra katrorë tokë, mes të cilave dhe baza strategjike të shtetit sirian. Me konsolidimin e pushtetit, Assad, i përkrahur fuqimisht nga Kremlini, do të vijojë të mbetet një faktor kyç në zgjidhjen e mëtejshme të krizës në këtë shtet. Mbështetja e Sirisë i sjell përfitime gjeopolitike Rusisë. Aktualisht mes dy vendeve ka një marrëveshje në fuqi për shfrytëzimin nga Moska të portit Tartus, që i mundëson Rusisë daljen në Detin Mesdhe. Gjithashtu Siria është blerësi i shtatë më i madh i armëve rusë dhe mes dy vendeve ka marrëveshje të ndryshme tregtare sa i takon gazit e naftës. Ndërkohë, zyrtarët amerikan kanë dhe një skenar tjetër për bombardimet ajrore ruse në Siri. Sipas gjeneralit të NATO-s Bredlov me sulmet e njëpasnjëshme dhe pa kriter, Moska ka nxitur emigrimin masiv drejt shteteve evropiane me qëllim lindjen e një krize të re në be dhe shtetet anëtare të NATO-s.