Certifikata e vaksinimit nuk do të jetë e detyrueshme për të udhëtuar drejt Greqisë. Ministri i Turizmit Haris Theoharis, në një intervistë për mediat vendase sqaroi se edhe pse një kartë vaksinimi do të lehtësonte lëvizjen e qytetarëve, nuk do të vendoset si kusht.
HARIS THEOHARIS
MINISTRI I TURIZMIT NE GREQI
“Qytetarët do të kenë mundësinë të lëvizin lirshëm në vendin tonë në dy mënyra, përmes tamponit negativ ose përmes testit të shpejtë. Ata që nuk janë vaksinuar do të duhet të testohen, por mbetet vendimi i komitetit shëndetësore nëse kjo do të vlejë për të gjitha shtetet . Por ata që do të jene te pajisur me një certifikatë vaksinimi do të kalojnë lirshëm.”
Një ditë me parë kryeministri grek Kiriakos Mitsotakis i propozoi Bashkimit Europian të përdoret një certifikatë vaksinimi për të mundësuar lëvizjen e lirë. Ai i dërgoi një letër presidentes së Komisionit Evropian Ursula von der Layen duke kërkuar miratimin e propozimit nga të gjitha vendet anëtare të BE.
