Prokuroria ka paralajmëruar mediat se do të ndiqen penalisht ato që kanë nxjerrë email-et dhe dokumentet e klasifikuara si sekret të ish-Drejtorit të Policisë Gledis Nano, të nxjerra fillimisht diten e sotme nga grupi i hakerave “Homeland Justice”.  

 

Policia bën me dije se Prokuroria e Tiranës ka vendosur sot ndalimin e publikimit të çdo të dhëne të botuar nga autorët e sulmit kibernetik dhe i ka kërkuar AMA-s dhe AKEP-it të ndihmojë rreth këtij urdhëri.  

 

Pra, pasi te gjitha të dhenat jane shperndare nga te gjitha televizionet, portalet, radiot dhe rrjetet sociale, Prokuroria e Tiranes është kujtuar që të vendose ndalimin e publikimit.  

 

 

Kjo eshte praktikisht e pamundur, jo vetem sepse cënon lirine e medias dhe të informimit, por edhe sepse çdo qytetar tashme posedon të dhënat sekrete që janë hakeruar.

 

 

Tentativa të tilla që cënojnë lirinë e medias janë në kundërshtim të plotë me legjislacionin në fuqi, me Kushtetutën e Shqipërisë dhe me parimet bazë të ndarjes së pushteteve, ku media ka rolin e saj në një demokraci funksionale.  

 

 

Do të ishte më e udhës që Prokuroria të merrej me hakeruesit sesa me publikuesit.  

 

 

Reagimi i plotë:

 

Policia e Shtetit

 

Në zbatim të vendimit të prokurorit të Prokurorisë së Rrethit Gjyqësor Tiranë, të datës 19.09.2022, për sekuestrimin e të dhënave, në kuadër të procedimit penal Nr.5430 të vitit 2022, për veprat penale “Ndërhyrja në të dhënat kompjuterike”, “Ndërhyrja në sistemet kompjuterike”, dhe “Keqpërdorimi i pajisjeve” bëjmë me dije mediat dhe opinionin publik se:

 

Me vendimin e datës 19.09.2022, Prokuroria ka vendosur ndalimin e publikimit të çdo të dhëne të botuar nga autorët e sulmit kibernetik, vendim ky në zbatim të nenit 103 të Kodit të Procedurës Penale “Ndalimi i publikimit të aktit”.

 

Prokuroria ka vendosur që asnjë e dhënë e botuar nga autorët e sulmit kibernetik të mos publikohet nga mediat audiovizive, të shkruara, online, në rrjete sociale apo në çdo formë të publikimit apo transferimit të të dhënave që postohen nga autorët e këtij sulmi kibernetik mbi sistemin TIMS të Policisë së Shtetit.

 

Prokuroria ka ngarkuar Njësinë C për Hetimin e Krimit Kibernetik në Policinë e Shtetit, Autoritetin e Mediave Audiovizive (AMA) dhe Autoritetin e Komunikimeve Elektronike dhe Postare (AKEP), që të grumbullojnë të gjithë informacionin e deritanishëm dhe të ardhshëm të të dhënave objekt sekuestrimi.

 

Në rast të shkeljes së këtij vendimi nga cilido, Njësia C për Hetimin e Krimit Kibernetik në Policinë e Shtetit do të nisë menjëherë hetimin në kuadër të procedimit penal Nr.5430/2022, për vendosjen përpara përgjegjësisë ligjore të personave përgjegjës.

 

Policia e Shtetit kërkon mirëkuptimin e mediave dhe të opinionit publik, pasi publikimi i këtyre të dhënave cënon rëndë rendin publik dhe sigurinë kombëtare.

Leave a Reply

Your email address will not be published.