Çelet festivali i filmit me metrazh të shkurtër në Korçë
Çelet në qytetin e Korçës festivali ndërkombëtar i filmit me metrazh të shkurtër i quajtur Korça Short Film Fest.
Drejtori i këtij festivali Gledis Bica sqaroi në një konferencë shtypi detaje të aktivitetit që shënon edicionin e dytë radhazi në Korçë. Ai tha se janë përzgjedhur 50 filma nga 27 regjisorë të vendeve të ndryshme.
Prurja në zhanrin e filmit të shkurtër ka qënë edhe më e madhe sepse u paraqitën në konkurimin fillestar mbi 800 filma nga 37 vende.
Këtij festivali i parapriu për disa ditë programi KIDS me fëmijë të moshave nga 7-12 vjeç që realizuan filma të shkurtër dhe u njohën me teknikat e tij.
Risi e këtij edicioni është të parit e filmave edhe me syze virtuale thanë organizatorët.
Festivali i filmit të shkurtër nis të hënën në ambjentet e teatrit të Korçës ku do të shfaqet një pjesë e krijimtarisë dhe tjetra në sheshin pranë kullës të qytetit.
Ky aktivitet kulturor mbështetet nga bashkia Korçë, Ministria e Kulturës, si dhe ambasadat austriake dhe franceze të atashuara në Tiranë. Festivali zhvillohet nga datat 8-12 korrik në Korçë.
