Protagonisti i serialit “Familja e Madhe”, Oktaj Kajnarxha, i ka dhënë një çek të bardhë Melisa Ozge Jëlldërëmerit, gruas së kolegut të tij, aktorit Junus Emre Jëlldërëmeri. Sipas lajmit të Ali Ejyboullusë, të publikuar në gazetën “Milijet”, Kajnarxha i ka thënë Melisa Ozge Jëlldërëmerit: “Bëni një fëmijë dhe unë do të të blej çfarë dhurate të duash.”
Ky është shkrimi i Ali Ejyboullusë: “Junus Emre Jëlldërëmeri, që luan rolin e Alpasllan Çakërrbejliut, në serialin “Familja e Madhe”, është i martuar me Melisa Ozge Jëlldërëmerin, që ka luajtur në të njëjtin serial, sezonin e kaluar. Çifti u martua në vitin 2012, por miqësia e tyre kishte nisur dhjetë vite më parë, ndërsa studionin në Universitetin “Haliç”. Junus Emre Jëllëdërmeri ka shtatë vite i martuar me Melisa Ozgen, e cila është shtatë vite më e vogël se ai dhe dëshira e tij më e madhe është të bëhet sa më parë baba. Kurse dëshira e Melisa Ozge Jëlldërëmerit nuk është fëmija, por karriera.
Kajnarxha e di këtë, ndaj në dasmën e Funda Barënit me Ata Tyrkoullunë, ai i bëri një lloj “presioni” Melisa Ozge Jëlldërëmerit për të lindur një fëmijë. Kajnarxha i tha aktores së re: “Bëni sa më parë një fëmijë, që të mos pendoheni si unë, më vonë. Në fillim karriera, pastaj fëmija. Ç’është kjo? Tani aktoret bëjnë edhe fëmijë, edhe karrierë.” Kajnarxha pa që Melisa Ozge Jëlldërëmeri nuk po ia vinte veshin këshillës së tij dhe i dha një çek të bardhë asaj: “E di që Junus Emreja do të bëhet baba sa më parë, ndaj po të bëj një propozim të tillë: bëni një fëmijë dhe unë do të të blej çfarë dhurate të duash.” Melisa Ozge Jëlldërëmeri, në përgjigje të këtij propozimi të Kajnarxhas, edhe pse me gjysmë zëri, tha: “Mund të bëhet.”
