Bushati në familjen e Florenc Beqirajt: Hetim ngjarjes
Ministri për Europën dhe Punët e Jashtme Ditmir Bushati, ka vizituar familjen e Florenc Beqirajt në Shkodër, ku shprehu ngushëllimet për humbjen e jetës së të afërmit të tyre. Bushati tha se kontaktet me autoritetet franceze janë të pandërprera, për të mësuar më shumë mbi hetimet që po kryhen atje.
I zgjedhur deputet në Qarkun e Shkodrës në zgjedhjet e 2017-ës, Ditmir Bushati premtoi se qeveria do të marrë përsipër shpenzimet e sjelljes pranë familjes së trupit të pajetë të Florenc Beqirajt.
23-vjeçari Florenc Beqiraj kishte shkuar në Francë për të kërkuar azil, ku ishte ndaluar nga policia për mungesë dokumentacioni dhe që prej datës 15 dhjetor 2017, ishte shtruar në spitalin e Marsejës, në gjendje kome për shkak të mosfunksionimit të pjesës më të madhe të trurit.
Ndërkohë, Ambasada e Shqipërisë ne Francë është shprehur se po ndjek nga afër çështjen me autoritetet policore dhe gjyqësore franceze, në pritje të përfundimit të hetimit zyrtar.
