Gjykata ka lënë në burg 4 shtetasit nga Kosova të arrestuar më herët nga Trafiqet e Tiranës për trafik armësh. Togat e zeza kanë pranuar kërkesën e prokurorisë dhe kanë lënë në qeli Blerim dhe Muhamed Krasniqin, Benjamin Shalën dhe Edonis Thaçin.
Hetimet treguan se katër të rinjtë i merrnin armët në Serbi dhe më pas i trafikonin në Shqipëri me qëllim për tua shitur grupeve kriminale.
Ata bashkëpunonin me trafikantë serbë, që i merrnin pistoletat, automatikët dhe municionet në Çeki. Blerim dhe Muhamed Krasniqi, Benjami Shala dhe Edonis Thaçi rezulton të kenë trafikuar edhe herë të tjera armë në Shqipëri.
Bisedat e gjetura në celularët e tyre tregojnë komunikime me persona të ndryshëm që dyshohet se janë klientë të tyre. Sipas hetimeve, ka dyshime të forta se ky grup kriminal ka trafikuar shumë armë edhe drejt Greqisë për llogari të bandave kriminale atje.
Armët vinin nga Kosova në Shqipëri të fshehura në autobusët që ishin në pronësi të Edonis Thaçit. /vizionplus.tv
