Sekretar i Përgjithshëm i PL-së, Tedi Blushi komentoi në emisionin Quo Vadis arrestimin e Erion Veliajt.
Blushi tha se ky arrestim ka ardhur shumë me vonesë, pasi duhet të kishte ndodhur tetë vite më parë.
Sekretar i Përgjithshëm i PL-së shprehet se Veliaj po vazhdon të vjedhë edhe nga qelia
Pjesë nga biseda:
Borakaj: Ju organizoni protesta mujore para Bashkisë. Në fund, Veliaj është para drejtësisë. A e konsideroni këtë një sukses? A është rritur besueshmëria juaj tek SPAK?
Blushi: Finalja e Veliajt erdhi shumë vonë. Jam krenar që përfaqësoj një politikë që ka qenë koherente në qëndrimet e saj. Ky arrestim është i vonuar. Veliaj duhej të ishte arrestuar 8 vite më parë, kur u publikua shkresa me firmën e tij që i hapi rrugën inceneratorit fantazmë të Tiranës. Veliaj edhe sot në qeli vazhdon të vjedhë. Ai ka shtrirë duart edhe në Durrës dhe po vazhdon të abuzojë. Zoti Ahmetaj provoi vërtetësinë e akuzave të drejta të opozitës. Nuk jam i kënaqur me këtë arrestim, pasi ka ardhur shumë vonë.
Për liderët kryesorë të opozitës, SPAK ka hetuar për 7 vjet. Ndërkohë, kreu i organizatës kriminale 5D dhe inceneratori fantazmë janë fakte të pakundërshtueshme. Antimafia italiane ka publikuar prova. Bashkëortaku i Veliajt është i arrestuar në Itali, por a ka një akuzë për Veliajn për këto çështje? Ne kemi parë vathë, fustane dhe bizhuteri, por jo këto raste. Sepse këto janë krime të vërteta. Nëse dikush vjedh qindra miliona euro dhe përfundon i arrestuar për vetëm 1 milion euro të shpenzuara nga bashkëshortja… Ku po shkojnë paratë?
Prandaj ne besojmë dhe kjo është e vërteta. Bashkia e Kavajës rrezikon të falimentojë sepse paguan për inceneratorin e Veliajt. Berisha u la në arrest shtëpi një vit më parë, por nuk ka asnjë firmë të tij në dokumente.
Kryebashkiaku i Tiranës, Erion Veliaj, u arrestua mëngjesin e 10 shkurtit nga zyrtarë të SPAK dhe BKH-së. Hetimet për Veliajn filluan me kontrolle në zyrat e kompanisë së bashkëshortes dhe sekuestrimin e telefonit të tij celular, më 6 dhjetor, nga oficerët e policisë gjyqësore. Po ashtu, kontrollohet edhe banesa e vëllait të kryebashkiakut. Prokuroria e Posaçme ka hapur një hetim pasuror ndaj Veliajt dhe po shqyrton rolin e tij në çështje të ndryshme, përfshirë atë të inceneratorit të Tiranës dhe lidhjet me kompaninë “5D”. /vizionplus.tv
