Bulqizë, bie numri i të paraqiturve në spital me helmim
Kjo e mërkurë ka qenë më e qetë në spitalin e Bulqizës, ku bëhet me dije se janë ndaluar rastet e helmimeve që nisën nga e shtuna e kaluar.
Ndërkohë kujtojmë se të martën kanë qenë 7 raste të reja që janë paraqitur për të marrë ndihmë pranë spitalit. Me gjithë situatën që duket e qetë, banorët e lagjes së vjetër në Bulqizë vijojnë të mos e konsumojnë ujin e rrjetit, nga frika e helmimit.
Aktualisht qytetarët po furnizohen nga burime natyrale jashtë qytetit.
Megjithëse një ditë më parë ISHP deklaroi se uji i rrjetit nuk ka ndotje mikrobiale, priten analizat fiziko-kimike dhe ato toksikologjike për të vërtetuar që helmimi i rreth 120 personave nuk ka ardhur nga uji i rrjetit.
Policia e Bulqizës vijon hetimet për rastin pas inspektimeve të depove të ujit mbi qytet si dhe veprës së marrjes në një nga ish galeritë e minjerës së Bulqizës.
