Sektori më i rëndësishëm në vend, bujqësia duket se është përfshirë në një krizë besimi sa i përket prodhimit vendas.
Sasi me fruta dhe perime të destinuara për eksport, kohët e fundit janë kthyer sërish në vendin e origjinës, pasi rezultojnë me kimikate të dëmshme. Por i kujt është faji, i fermerit, agronomit, tregtarit apo i shtetit?
Baki Dervishi, agronom, thotë se fermeri ka nevojë për asistencë.
“Në mënyrë absolute nuk mendoj se fermeri e bën me qëllim që të përdorë plehra kimikë të dëmshëm, që ndikojnë në cilësisë e produkteve në finale. Sot fermeri shqiptar nuk ka njohuritë e duhura lidhur me frekuencën e përdorimit të pesticideve si dhe me kohën që njihet me emrin “Karenca”, e cila ka një afat përdorimi që nuk të lejon ta vjelësh produktin pa u respektuar kjo kohë. Paralelisht është e nevojshme që shteti të ndihmojë fermerin me analiza kimike të tokës për të kuptuar se çfarë përmbajtje kanë tokat në Shqipëri, në mënyrë që fermeri të dijë si ta përdorë. Ndërkohë çdo fermer duhet të ketë një asistencë nga agronomi për të patur një cilësi edhe më të madhe në finale”, tha Dervishi për “E-ZONE”
“E-ZONE” bisedoi me disa fermerë në zonën e Pezës në Tiranë. Disa prej tyre e kanë gjetur zgjidhjen me përdorimin e plehrave organikë, siç janë “AZ Fert” dhe “Nutrivive”.
Sipas tyre përdorimi i plehrave organikë ka ndikuar jo vetëm në cilësinë finale të produktit, por edhe në rendimentin e bimës. Por cilat janë vlerat e shtuara nëse fermerët përdorin plehra organikë?
“Ne prodhojmë dy plehërues organikë që janë të certifikuar dhe luftojnë problemet kryesore që kanë sot fermerët. Një prej problemeve është degradimi i tokës. Plehëruesit kimikë kanë luajtur rolin e tyre në bujqësi sepse kanë rritur prodhimin, por fatkeqësisht kanë sjellë dëme në tokë. Sot toka është e degraduar dhe për rrjedhojë lëshon mbetje në bimë për shkak të përdorimit pa kriter të pesticideve. Prandaj plehëruesit organikë bëjnë pikërisht pastrimin. Pra nuk flasim për bujqësi sot, por bujqësi për mot.
Elementi i dytë është rendimenti, plehëruesit e rrisin bimën në mënyrë më të shëndetshme. Pra një bimë e pashëndetshme do të preket nga sëmundjet. Ndaj përdorimi i plehrave organikë përkthehet në siguri ushqimore. Ndërkohë një tjetër element është se plehrat organikë ndihmojnë në uljen e përdorimit të pesticideve”, sqaroi për “E-ZONE” Drini Zusi, sipërmarrës.
Por ekspertët e fushës edhe politikat që aplikon shteti në këtë sektor nuk janë të duhurat.
Ish-zv.ministri i bujqësisë Alban Zusi gjatë një interviste për “E-ZONE” tha se politikat bujqësore janë të prapambetura.
“Sot politikat bujqësore janë të prapambetura. Sot buxheti i shtetit bën thjesht një ndarje të parave apo jep një subvencionim, por nuk i jep zgjidhje nevojave të sektorit. Politikat duhet të jenë të tilla që të nxisin produktet inovatore. Duke kuptuar nevojat dhe problemet edhe buxheti duhet ndarë në funksion të zgjidhjes së tyre. Fatkeqësisht sot nuk ndodh kjo në vendin tonë”, tha Zusi.
Siguria ushqimore mbetet një nga sfidat më të mëdha dhe më urgjente për Shqipërinë, në një kohë kur kërkesa për produkte të shëndetshme dhe të kontrolluara po rritet ndjeshëm edhe për të shkak të procesit të integrimit.
Pavarësisht përpjekjeve institucionale, ligjeve në fuqi, zinxhiri ushqimor vazhdon të përballet me mangësi në kontroll, transparencë dhe në zbatim të standardeve. Mungesa e laboratorëve të certifikuar, inspektim i dobët dhe informaliteti në prodhim janë faktorët që cenojnë shëndetin e qytetarëve, por edhe besimin e produkteve vendase.
Ndaj theksi vihet te një ndërhyrje e thellë dhe koordinuar, që përfshin dhe edukimin e fermerit dhe konsumatorit.
Siguria ushqimore nuk është thjesht një çështje teknike, është një e drejtë themelore dhe një garanci për zhvillim të qëndrueshëm. Garantimi i saj nuk është vetëm një e drejtë e fermerit, por e të gjithë zinxhirit, nga ferma në tavolinë. Nëse ky zinxhir do të funksionojë, atëherë edhe fermeri do të fitojë vendin që meriton në shoqëri.
/vizionplus.tv
