Qëndrimi i Britanisë në Bashkimin Europian e bën këtë shtet shumë herë më të madh dhe të fuqishëm. Ky është mesazhi që presidenti i Shteteve të Bashkuara të Amerikës ka përcjellë përmes një shkrimi të tij në të përditshmen “Daily telegraf”. Obama shkruan se bashkëpunimi sa i takon shkëmbimit të informacionit nga shërbimet inteligjente, punësimi dhe rritja ekonomike do të jetë më efektive brenda familjes europiane. Eshtë koha për aleatët të qëndrojnë bashkë, shkruan presidenti. Ndërsa në një interviste për BBC Obama theksoi se çështja e referendumit ndiqet me mjaft shqetësim nga Uashingtoni.
“Vendimi juaj është një çështje me interes të veçantë për Shtetet e Bashkuara të Amerikës. Dhjetëra mijëra amerikanë, të cilët jetojnë e punojnë në vendin tuaj janë një dëshmi e ndërlidhjes, prosperitetit dhe sigurisë mes dy shteteve. Dalja ose jo e Britanisë nga BE-ja përbën një shqetësim që ndjehet edhe në Uashington”.
Presidenti amerikan do të qëndrojë në një vizitë tre ditore në Britani. Ky shtet do të mbaje një referendum në të cilin qytetarët do të shprehin vullnetin e tyre, nëse dëshiron që vendi të jetë ende pjesë e BE-së apo të dalë prej saj.
