Ligjvënësit në Mbretërinë e Bashkuar nuk arritën të binin dakord për të gjetur opsionin alternativ për planin e Brexit të kryeministres Theresa May.
Ata votuan mbrëmë për 4 variante mbi hapat e mundshëm të Brexit, në përpjekje për të thyer bllokadën në Parlament, por asnjëra nuk arriti të marrë mbështetjen e shumicës.
Më afër miratimit ishte propozimi për të mbajtur Britaninë pjesë të bashkimit doganor me BE-në, që dështoi për vetëm tre vota. Ligjvënësit në opozitë, kanë bërë thirrje për një tjetër debat mbi 4 opsionet e dështuara në votimin e së hënës,
Ministri për Brexit, Steven Barclay tha në parlament se mundësia më e madhe është që Britania të largohet pa marrëveshje nga Bashkimi Evropian më 12 prill. Por nga ana tjetër ky do të ishte skenari më i frikshëm për shumë biznese ndërkombëtare.
Sipas mediave, kryeministrja Theresa May mund të hedhë për serish ne votim marrëveshjen brenda javës, me qëllim që të sigurojë një largim të rregullt para zgjedhjeve të Parlamentit Europian më 23 maj.
May do të kryesoje sot një takim disa orësh me ministrat e kabinetit në mesin e vorbullës që ka krijuar procesi i divorcit me unionin dhe presionit të vazhdueshëm nga BE. Mediat shkruajnë se ekziston edhe mundësia për të mbajtur zgjedhje të parakohshme.
Pas një jave të trazuar në përpjekje për të zhbllokuar Brexit, e ardhmja e procesit është e zhytur në paqartësi. Ky është ndryshimi më i madh politik në Mbretërinë e Bashkuar që nga Lufta e Dytë Botërore.
