Një stuhi e fuqishme goditi Stambollin gjatë natës së të premtes, duke shkaktuar përmbytje dhe dëme të mëdha. Rrugët dhe metrotë u bllokuan për shkak të erërave të fuqishme dhe reshjeve të dendura. Autoritetet urdhëruan edhe mbylljen e aeroportit Ataturk, si dhe anuluan të gjitha fluturimet. Qytetarët e Stambollit janë habitur për shkak të madhësisë së breshrit që solli shiu. Qindra automjete kanë pësuar dëmtime për shkak të goditjes së breshrit. Edhe disa pallate pësuan të çara.
Banorët thanë për mediat se nuk kanë parë asnjëherë reshje të tilla, ndonëse ndërtesat janë dëmtuar njësoj si të jenë goditur nga plumbat. Të paktën 10 persona janë lënduar për shkak të breshrit, por fatmirësisht nuk raportohet për viktima. Vetëm pak orë pas reshjeve masive, rrugët janë mbushur me ujë e me pemë të rrëzuara. Mediat turke raportojnë se transporti publik është ndërprerë dhe kjo ka sjellë bllokimin e lëvizjes së qytetarëve.
Gjatë javëve të fundit Stambolli është goditur nga stuhi që kanë bllokuar trafikun dhe kanë pezulluar transportin publik, ndërsa pjesa tjetër e vendit vazhdon sezonin turistik. Edhe veriu i Italisë u përfshi pak ditë më parë nga breshëri, i cili mbuloi një pjesë te madhe te plazheve, duke larguar pushuesit.
