Në kulmin e tensioneve mes SHBA-së, Japonisë dhe vendeve të tjera fqinje me Korenë e Veriut, për shkak të testeve të armëve bërthamore, inteligjencia britanike për marrëdhëniet me jashtë ka publikuar një raport, që mund të shkaktojë një tërmet në nivel ndërkombëtar.
“The Sunday Telegraph” ka botuar një dokument sekret, në të cilin ngrihen dyshime se Rusia dhe sidomos Irani, mund të kenë ndihmuar Korenë e Veriut për të zhvilluar programin e saj atomik. Rapori evidenton se ka dyshime të forta që shkencëtarët koreano veriore të jenë ndihmuar nga jashtë për të cuar në atë nivel zhvillimin teknologjik, pasi burimet dhe kapacitetet e tyre janë të pamjaftueshme.
Irani, thekson raporti është në krye të listës së vendeve që dyshohet të kenë asistuar me pajisje të zhvilluara, ndërsa Rusia ka qenë në dijeni të gjithë kësaj ndihme, që e kanë shndërruar Korenë e Veriut një vend me potencial kaq të madh atomik.
Koreja e veriut ka provokuar komunitetin ndërkombëtar duke kryer testime të bombës me hidrogjen. Shtetet e bashkuara janë shprehur të gatshme edhe për përgjigje ushtarake, ndërsa Kina dhe Rusia kanë mbajtur qëndrimin se konflikti duhet të zgjidhet me dialog. Më herët edhe Ministria e Jashtme franceze dha alarmin se raketat e diktatorit Kim Jong Un mund të godasin Europën, para Shteteve të Bashkuara.
