Në mbarë botën është kremtuar Pashka, një nga festat më të mëdha për besimtarët e krishterë, e cila këtë herë përkoi në të njëjtën ditë për të gjitha degët e krishterimit.
Nga Vatikani në Jeruzalem, nga katedralet madhështore të Evropës deri te komunitetet e vogla, festimet u zhvilluan me ceremoni të veçanta, lutje dhe meshë solemne.
Në Jeruzalem, qytetin e shenjtë për besimtarët e krishterë, qindra pelegrinë ndoqën ritualet në Kishën e Varrit të Shenjtë, duke kujtuar ngjarjet që, sipas besimit të tyre, ndodhën më shumë se dy mijë vjet më parë. Pashka në Jeruzalem u kremtua edhe nën hijen e luftës në Gaza, e cila ka shkaktuar mijëra viktima.
Ndërkohë, Papa Françesku pritet të udhëheqë meshën tradicionale të Pashkës në Sheshin e Shën Pjetrit, ku mijëra pelegrinë nga vende të ndryshme janë mbledhur për të ndjekur fjalimin dhe bekimin e tij.
Edhe në shumë vende të tjera, Pashka ka kulmuar me parada tradicionale dhe momente gëzimi familjar.
Në Evropën Qendrore dhe Lindore, vende si Polonia, Rumania dhe Bullgaria kanë ruajtur traditat e lashta, ndërsa në Shtetet e Bashkuara dhe Australi, komunitetet e krishtera e kanë festuar këtë ditë të shenjtë me meshë dhe grumbullime familjare.
Edhe në Ukrainë, Pashkët po festohen mes luftës. Pavarësisht se Presidenti Putin deklaroi se për këtë ditë do të kishte armëpushim, Presidenti Zelensky e ka akuzuar për sulme gjatë natës.
Megjithëse forma e festimeve ndryshon nga një vend në tjetrin, mesazhi i Pashkës mbetet i njëjtë: shpresë, rilindje dhe dashuri.
/vizionplus.tv
