Policia e Tiranë ka zbardhur ngjarjen e ndodhur në orët e para të mëngjesit të 10 marsit në rrugën “Vasil Ndoçka”, ku shpërtheu një sasi lënde plasëse në automjetin në pronësi të Oltjon Klosit.
Gazetari i Vizion Plus, Esido Barkaj, ka siguruar foton e 32-vjeçarit Jurgen Gjonaj, i cili dyshohet se ka vendosur dhe shpërthyer tritolin në automjetin e Oltjon Klosi. Sipas hetimeve, Gjonaj është ndihmuar nga gjashtë persona të tjerë, ndërsa lënda plasëse dyshohet se është vendosur me porosi të Sabah Nuzi.
Hetimet tregojnë se konflikti mes Nuzi dhe Klosit ka nisur prej disa kohësh për një shumë prej 15 mijë eurosh. Borxhi ishte marrë jashtë shtetit, në Spanjë, dhe sipas policisë, paratë vinin nga pazare droge. Klosi pretendonte se kishte shlyer borxhin, ndërsa Nuzi insistonte se i dëmtuari i detyrohej edhe 15 mijë euro. Pasi Klosi refuzoi të paguante shumën e kërkuar, Nuzi urdhëroi grupin e të arrestuarve që t’i vendosnin tritolin automjetit të Klosit.
Nuzi rezulton me precedentë të shumtë penalë. Në vitin 2020 ai u arrestua nga policia në Mat pasi kishte qëlluar me armë në ajër dhe kishte kërcënuar një person. Ndërsa në vitin 2012, në moshën 18-vjeçare, u arrestua për plagosjen e tre personave me armë zjarri.
Aktualisht, Nuzi ndodhet i paraburgosur në Burgu i Fushë-Krujës, i akuzuar për disa vepra penale, mes tyre “Vrasje për gjakmarrje”, “Mbajtja pa leje e armëve dhe lëndëve shpërthyese”, “Fshehja ose asgjësimi i kufomës”, si dhe për pjesëmarrje në grup të strukturuar kriminal dhe organizatë kriminale.
Në kuadër të operacionit policor të koduar “Porosia”, janë arrestuar shtatë persona të dyshuar si pjesë e një grupi të strukturuar kriminal, të cilët rezultojnë me precedentë të theksuar penalë.
/vizionplus.tv
