Deputeti i PD, Luçiano Boçi ka akuzuar kryeministrin Edi Rama se ka lënë në harresë Elbasanin.
Në një postim në “Facebook”, Boçi duke u ndalur tek vizita e kreut të qeverisë në Elbasan, deklaroi duke ironizuar se Rama po e viziton qytetin për arrtijen historike të papunësisë dhe mjerimit.
Boçi akuzoi kreun e qeverisë gjitahshtu se ka shkatëruar edhe Universitetin e Elbasanit pasi, sipas tij, shumica e degëve janë mbyllur.
“Rama na paska surprizuar Elbasanin?! Me siguri nga “trimëria” që e karakterizon vjen papritur e pa pandehur. Zakonisht e keqja ka këtë formë ardhje. “Hapi derën”- thonë në Elbasan. Po çfarë vjen “të inagurojë” ky tipi gjysëm Kryeministër, gjysëm Ministër i jashtëm, në Elbasan?! Vjen për arritjet historike të papunësisë e të mjerimit që është ulur këmbëkryq në qytetin më të ndotur të Shqipërisë?! Ndoshta vallë vjen për rrugën Tiranë-Elbasan, për të cilën ke gjashtë vite që mashtron, dredhon e deliron?! Ndoshta për gjendjen mjerane të konvikteve mesjetare?! Fotot e video e dëshmojnë qartë gjendjen. Aaaa po! Ti Rame po vjen për të inaguruar shkatërrimin e Universitetit Publik të Elbasanit dhe projektin tënd, për asgjësimin e mësuesisë dhe degëve të tjera e më pas shndërrimin e tij në një Kolegj pa vlerë. Zero lekë investime ke sjellë për gjashtë vite në këtë Universitet. Shikoi mirë shifrat, se si në sajë të qeverisë tënde e Ligjit tënd e formulës të pranimit, sot në Universitetin e Elbasanit degët themelore bazë të tij që i dhanë famën e vlerën, janë katandisur në këto shifra: Gjuhë-Letërsi 14 studentë; Gazetari 27 studentë; Histori-Gjeografi 11 studentë; Gjuhë shqipe frënge 9 studentë; Gjeografi gjuhë italiane 0 (e mbyllur); Histori gjuhë gjermane 0 (e mbyllur); Gjermanisht 0 (e mbyllur); Italisht 0 (e mbyllur); Frengjisht 0 (e mbyllur); Matematikë 9 studentë; Bio-Kimi 13 studentë. Kjo është e vërteta e arritjeve të tua. Mos u mundo të pllaquritesh në ato monologjet e tua të pështira, për të mashtruar me pakte sakate studentet e pedagogët, sepse ti je tipi Kryeministër që ke prerë në besë e në shpresë studentët, qytetarët, fermerët, biznesin. Hajde ha një “peshk” të bardhë në Labinot se aq meriton!”
