Bllokohet për 25 ditë korsia e autostradës Tiranë-Durrës, do të kryhen punime

Nga dita e mërkurë, 19 tetor dhe për 25 ditë me radhë qarkullimi në autostradën Tiranë-Durrës do të jetë me një korsi.

 

Autoriteti Rrugor Shqipëtar njoftoi se do të nisë punimet për rehabilitimin e shtresave asflatike.

 

 

Bëhet fjalë për aksin rrugor nga Ura e Dajlanit në drejtim të Tiranës deri në mbikalimin e Kasharit. ARRSH ka bërë një grafik të punimeve së bashku edhe me policinë rrugore me qëllim bllokimin e gjatësisë së rrugës sipas segmenteve te caktuara.

 

Autoriteti njofton se punimet do të jenë të shoqëruar me sinjalistikën përkatëse, për të shmangur çdo aksident të mundshëm, ndërsa kërkohet edhe mirkuptimi i shoferëve deri në përfundimin e plotë të punimeve.

 

 

Në kuadër të zbatimit të kontratës së mirëmbajtjes, nesër, më datë 19 tetor 2022 në orët e para të mëngjesit do të fillojë rehabilitimi i shtresave asfaltike të aksit rrugor Tiranë–Durrës, proces pune që sipas grafikut të hartuar do të zgjasë 25 ditë për të dyja senset e lëvizjes.

Procesi i punës do të fillojë nga Ura e Dajlanit në drejtim të Tiranës (deri në mbikalimin e Kasharit).

Do të punohet me njërën korsi, përkohësisht të bllokuar, për një gjatësi prej 500m, sipas skemave të miratuara të menaxhimit të trafikut në bashkëpunim me Policinë Rrugore.

Njëra korsi lëvizjeje do të jetë e lirë për drejtuesit e mjeteve dhe tjetra do të jetë përkohësisht e bllokuar në një gjatësi prej 500m.

Me përfundimin e punës në këtë gjatësi, bllokimi do të spostohet në 500m të tjerë për vijimin e punës.

Me qëllim shmangien e aksidenteve, udhëzojmë drejtuesit e mjeteve, të zbatojnë sinjalistikën rrugore të vendosur në objekt.