Policia ka bllokuar guroren, në Borizanë të Krujës, dy ditë pas videos së bërë publike, ku duken anëtarët e fisit Rraja duke dhunuar barbarisht dy kushërinjtë Jashar dhe Bilbil Maja.
Ndërkaq, veç kontrollit të ushtruar në gurore, uniformat blu kontrolluan edhe 9 shtëpi, të cilat dyshohet se janë dëmtuar nga aktiviteti i saj. Gurorja do të qëndrojë e bllokuar deri në përgatitjen e dokumentacionit të plotë që do të vlerësojë nëse distanca midis saj dhe shtëpive të banimit është apo jo e duhura.
Ngjarja e rëndë shkaktoi reagim të fortë publik, duke çuar në dorëheqjen e deputetit socialist, Rrahman Rraja, ku djali, vëllezërit e anëtarë të tjerë të fisit të tij janë shpallur në kërkim.
Ndërkohë sot pritet të njihen me masën e sigurisë Ineidi Rraja, Eni Kulla, Kujtim Përdaku dhe Andi Rraja, katërshja e parë e arrestuar për këtë ngjarje ku mbetën të plagosur rëndë dy kushërinjtë për veprat penale “Plagosja e rëndë me dashje”, “Mbajtja pa leje e armëve të zjarrit”, “Moskallëzimi i krimit” dhe “Veprime që pengojnë zbulimin e të vërtetës”.
