Qindra përfaqësues të bizneseve të Kosovës bllokuan hyrjet kryesore në Prishtinë, duke shprehur pakënaqësinë e tyre ndaj vendimit të Zyrës së Rregullatorit për Energji për liberalizimin e tregut të energjisë elektrike.
Ata kanë shprehur revoltën se ky kalim në tregun e lirë do të sjellë rritje të çmimeve të energjisë elektrike deri në 270% më të larta se aktualisht.
Vendimi, i cili hyn në fuqi më 1 qershor, detyron mbi 1.000 kompani me mbi 50 punëtorë ose me qarkullim vjetor mbi 10 milionë euro të dalin në tregun e hapur të energjisë, duke zgjedhur vetë furnizuesit e tyre.
Përfaqësuesit e bizneseve shprehen se nuk janë të përgatitur për këtë ndryshim, ndërsa kërkojnë që ai të shtyhet për një vit.
Para protestës kryeministri në detyrë i Kosovës Albin Kurti u shpreh se ky proces nuk duhet të shihet si i befasishëm, ndërsa theksoi se koha e barrikadave ka mbaruar.
“Për të mbrojtur 1% të ndërmarrjeve më të fuqishme, në kurriz të 99% të tjerëve dhe të familjeve anë e mbanë Kosovës, ata po tentojnë të vendosin barrikada në hyrjet e Prishtinës. Por koha e barrikadave në Kosovë ka kaluar, i kemi hequr ato kudo ku kanë qenë dhe jemi zotuar se nuk do të lejojmë të vendosen të reja”, tha ai.
Ndër të tjera, ai tha se edhe nëse plotësohet kërkesa e Odës Ekonomike të Kosovës, ajo nuk e zgjidh problemin aktual.
“Ajo që Oda Ekonomike e Kosovës nuk po ju tregon është se plotësimi i kësaj kërkese nuk e zgjidh problemin, përveçse e bartë koston e energjisë së këtyre 1 mijë e 200 ndërmarrjeve te faturat e secilit prej jush, secilës familje dhe mbi 100 mijë bizneseve të tjera, më të vogla, më pak të fuqishme dhe më pak të zëshme sesa disa të tjera”, shtoi më tej.
Vendimi nënkupton se të gjitha bizneset e mëdha nuk do të furnizohen më me energji përmes tarifave të rregulluara, por duhet të gjejnë vetë furnizuesin e tyre në tregun e lirë. Nëse nuk arrijnë ta bëjnë këtë, ato kalojnë automatikisht në treg të hapur me çmime të parregulluara.
/vizionplus.tv
