Mund të themi se ky ka qenë viti i Shakirës, nga suksesi dhe fama e marrë nga hitet e saj më të fundit, te divorci i bujshëm dhe shpërngulja në Miami. Ajo është kthyer në kryefjalën e rrjeteve sociale dhe portaleve ndërkombëtare të cilat ndjekin me kujdes çdo lëvizje të këngëtares. Së fundmi, Shakira u ngjit në skenën e mrekullueshme të “Billboard” pasi mori titullin “Gruaja e vitit”. Ajo dukej tejmase e emcionuar teksa pranoi çmimin dhe kishte përgatitur edhe një fjalim prekës.
Këngëtarja u shpreh:“Vjen një moment në jetën e çdo gruaje që nis të mos varet më nga dikush për ta dashuruar apo ta pranuar dhe kështu nis ta pranojë veten ashtu siç është. Kërkimi për dikë zëvendësohet me “kërkimin e vetes” dhe dëshira për të qenë e përsosur zëvendësohet nga dëshira për të qenë autentike. Gratë janë shumë më të forta nga ç’mendojmë ne. Ne jemi më të guximshme sesa mendojmë që jemi. Mendoj se jemi gjithashtu më të pavarura nga ç’mendojnë të tjerët.”
“Nuk ka shumë rëndësi nëse dikush është besnik apo jo, ajo që me të vërtetë ka rëndësi është të vazhdoni të jeni besnikë ndaj vetes,”- shtoi ajo duke i bërë të gjithë të mendojnë se po fliste rreth ndarjes nga ish-partneri dhe babai i fëmijëve të saj, Gerard Piqué.
Ata u ndanë vitin e kaluar, pas lajmeve të cilat aludonin që Pique nuk ishte besnik. Menjëherë pas kësaj, ai doli publikisht me të dashurën e tij të re dhe Shakira publikoi tre hite botërore me tematikë ndarjen e dhimbshme. Këngëtarja e hitit “Monotonía” e mbylli fjalimin e saj duke treguar sesi muzika e ka ndihmuar të kalojë momentet më të vështira në jetën e saj, përfshirë ndarjen traumatike.
“Në momentet që ndjeva se po humbisja veten muzika më ndihmoi të kthehem në rrugën e duhur,”-tha ajo.
Momentalisht diskutohet se Shakira mund të jetë në një lidhje romantike me aktorin e famshëm Tom Cruise, pasi janë parë së bashku në garën e “Formula 1”. Artistja kishte shkuar për të parë garën me djalin e saj Milanin dhe është fotografuar me aktorin hollivudian biseduar në ambientin e një galerie.
