6 të vdekur e 9 të plagosur është bilanci tragjik i disa aksidenteve të ndodhura në 24 orët e fundit.
Aksidenti më i rëndë u shënua në aksin Shkodër–Lezhë, pranë fshatit Dajç, ku një fuoristradë u përplas me një mjet trajler me targa serbe. Si pasojë e përplasjes fatale, kanë humbur jetën bashkëshortët Refije Çiço 56 vjeçe, dhe Luan Çiço 60 vjeç.
E plagosur rëndë nga ky aksident ka mbetur vajza e tyre Alketa Çiço si dhe fëmija e saj 3 vjeç, të cilët janë dërguar për ndihmë mjekësore ne spitalin e Traumës në Tiranë, ku ndodhen në gjendje të rënduar.
Po ashtu në gjendje kome ndodhet dhe shoferi i automjetit me të cilin udhëtonte familja Çiço, i riu Klevis Suçi.
Ndërkohë drejtuesi i trajlerit është identifikuar si Seid Islamoviç, banues në Novi Pazar në Serbi dhe është shoqëruar në polici, pasi dyshohet se një parakalim i gabuar i tij u bë shkak për aksidentin.
Katër persona të tjerë gjetën vdekjen në aksidente të ndryshme gjatë ditës së mërkurë duke rënduar bilancin.
