Sistemi Tims në të gjitha pikat e kalimit kufitar të Maqedonisë së Veriut është bllokuar. Ky fakt ka sjellë radhë të gjata qytetarësh që duan të kalojnë në vendin fqinj.
Prej orës 06.00 të mëngjesit të kësaj të shtune dhjetëra automjete dhe qytetarë kanë mbetur të bllokuar në doganën e Qaf Thanës. Defekti në sistemin e të dhënave është konstatuar nga pala maqedonase, e cila aktualisht po punon vetëm manualisht.
E njëjtë situatë është edhe në pikën e kalimit kufitar të Tushemishtit dhe Gorricës. Autoritetet e Kufirit ende nuk kane njoftim nga pala maqedonase se kur pritet të riparohet defekti në sistem.
Burime bëjnë me dije se pala maqedonase ka ndërprerë punën në të gjitha pikat kufitare që e lidhin Maqedoninë e Veriut me vendet e tjera të rajonit.
Mësohet se pala maqedonase nëpërmjet një komunikimi elektronik i ka bërë me dije autoriteteve tona se ditën e shtunë nuk do të punojë sistemi Tims, pa treguar arsyen e ndërprerjes së punës.
Ky komunikim ka bërë që autoritet shqiptare të mos njoftojnë në kohë qytetarët shqiptarë lidhur me pengesat që mund të hasin në pikat e kalimit kufitarë, duke sjellë vonesa në doganë.
