Ulet numri i shtetasve shqiptarë dhe të huaj që hyjnë në Shqipëri nga Greqia dhe Maqedonia e Veriut.
Një gjë e tillë ka ndodhur menjëherë pas festës së Krishtlindjes kur hyrjet në vendin tonë kanë qenë thuajse dyfish më të larta. Gjatë dy ditëve të fundit, nga pika kufitare e Kapshticës kanë hyrë më pak se 3000 persona në ditë, ndërsa në Qafë-Thanë kanë hyrë nga Maqedonia e Veriut më pak se 2000 shtetas shqiptarë dhe të huaj.
Nga ana tjetër, shtetasit shqiptarë dhe të huaj që dalin nga vendi ynë në drejtim të vendeve fqinje është edhe më i vogël, pasi në dy ditët e fundit kanë dalë drejt Greqisë më pak se 1400 persona gjatë 24 orëve, ndërsa në Maqedoninë e Veriut kanë shkuar më pak se 2000 persona në ditë.
Ndryshe nga pala greke dhe ajo maqedonase, të cilat kanë kusht për hyrjen ne vendet e tyre certifikatën e vaksinimit dhe tamponin negativ, për të hyrë në Shqipëri nga të gjitha pikat e kalimit kufitar me Greqinë dhe Maqedoninë e Veriut, gjithçka është më e lehtë, pasi nga ana e autoriteteve tona kufitare nuk kërkohet as tampon dhe as certifikatë vaksinimi.
