Në prag të festës së Krishtlindjeve dhe të Vitit të Ri konsumi për disa produkte ushqimore dhe ëmbëlsirat është me rënie krahasuar me vjet sipas kompanive prodhuese.
Rënie të konsumit këtë prag festash ka për produktet e bulmetit, brumërave dhe ëmbëlsirave me përjashtim të bakllavasë. Për përfaqësuesit e kompanive prodhuese të produkteve të bulmetit, të brumërave dhe ëmbëlsirave arsyeja kryesore e rënies së konsumit mbetet largimi i popullsisë në emigracion.
Ndërsa linjat e trageteve pohojnë se tashmë prej 8 vitesh nuk ka më fluks të ardhjes së emigrantëve në Shqipëri për festat e fundvitit.
Në këtë vigjilje festash rënia e fuqisë blerëse po ndihet më së shumti te fabrikat e përpunimit të qumështit. Taulant Pupa administrator i fabrikës përpunuese “Vita 2001” pohoi për Monitor se ende nuk fluks kërkesë për produktet e bulmetit, siç ndodh në muaj festash.
“Tashmë kërkesa për produkte bulmeti është jashtë parashikimeve tona. Aktualisht kërkesa në trendin e saj normal, ashtu siç ishte në muajin tetor apo nëntor. Rënia e kërkesës është si nga konsumatori dhe nga strukturat e hotelerisë. Nuk e prisnim këtë situatë. Mendoj se arsyeja kryesore mbetet largimi i popullatës në emigracion”. Pupa veçoi se gjatë sezonit turistik shtimi i fluksit të turistëve të huaj rriti shitjet 30% krahasuar me sezonin e 2022-it.
Rënie e konsumit ka edhe për produktet e brumërave dhe ëmbëlsirave.
Edhe Ali Devolli administratori i rrjetit “Alna” të prodhimit të produkteve të brumit dhe ëmbëlsirave tha se konsumi është me rënie për shkak të emigracionit dhe rritjes së çmimeve për produktet e tjera të shportës ushqimore.
“Pakësimi konsumit për produktet e brumit, duke përfshirë edhe të bukës dhe ëmbëlsirave nisi pas përfundimit të sezonit turistik. Tkurrja më e lartë e konsumit është te ëmbëlsirat. Arsyeja kryesorë që konsumi është me rënie mbetet emigracioni i popullatës. Faktor tjetër janë edhe çmimet e larta të produkteve të shportës ushqimore. Për pjesën dërrmuese të popullatës për shkak të të ardhurave të ulëta mbeten të papërballueshme. Kjo ka ndikuar te rënia e fuqisë blerëse”, pohon ai.
Sakaq rënie vijon të ketë edhe në fluksin e ardhjes së emigrantëve për festat e fundvitit.
Bernard Restos përfaqësuesit të kompanisë “Adria Ferris” në Durrës pohon se tashmë u bën 8 vit që fluksi i pasagjerëve në festat e fundvitit nuk është i lartë, pasi emigrantët e brezit të viteve ’90 nuk kanë më familjarë për të vizituar në Shqipëri.
Ndonëse çmimi i bakllavasë vijon të jetë i kriposur, kërkesa është me rritje
Ëmbëlsira e bakllavasë vijon të mbetet një nga produktet kryesore që familjet shqiptare konsumojnë për festat e fundvitit, ndonëse çmimet e shitjes së saj mbeten “ të kripura”.
Për këtë vit prodhuesit e ëmbëlsirës tradicionale pohojnë se nuk ,kanë ndryshuar çmimin e shitjes. Sipas tyre kërkesa krahasuar me vit mbetet më e lartë.
Konkretisht çmimi i bakllavasë tradicionale me arra kushton 1,000 lekë kg. Në periudhën e pandemisë, viti 2020 çmimi i bakllavasë me arra ishte 800 lekë për kg. Ndërsa çmimi i bakllavasë me pistaje varion nga 1,800 lekë në zonën e ish Bllokut, 2,000 lekë në zonat e Freskut dhe Kinostudios deri 2,500 lekë për kg në rrugën e Kavajës.
Shitësit e dyqanit “Istanbul Baklava” në rrugën e Kavajës pohon për Monitor se kërkesa për ëmbëlsirën e bakllavasë është me rritje krahasuar me vjet. Ata shtuan se çmimet kanë mbetur të pandryshuar prej 3 vitesh.
Edhe nga shitësit e dyqanit “Baklava in the Bllok” u pohua se çmimi nuk ka ndryshuar krahasuar me vjet.
Vitin e ardhshëm pritet rritje e çmimit të ëmbëlsirës së bakllavasë sipas prodhuesve. /Monitor
