Uashingtoni po shqyrton furnizimin e Ukrainës me transportues të blinduar personeli, tip ”Bradley”, tha presidenti amerikan, Joe Biden. Sipas ushtrisë amerikane, mjeti luftarak i blinduar mesatar zakonisht është i pajisur me një top, një mitraloz dhe raketa depërtuese dhe mund të shërbejë edhe si një transportues trupash. I pyetur nga një gazetar nëse furnizimi me automjete ”Bradley” në Ukrainë ishte “në shqyrtim”, Biden u përgjigj ”po”, pa dhënë detaje të mëtejshme. Fillimisht ishte e paqartë se cili model i ”Bradley”-it mund të dërgohej në Ukrainë.
Të mërkurën, Franca i tha Ukrainës se do ta furnizonte atë me “tanke të lehta beteje”. Tanku në fjalë thuhet se është mjeti i blinduar i zbulimit, tip AMX-10 RC. “Kjo është hera e parë që tanke të dizenjuara nga Perëndimi i janë dorëzuar forcave të armatosura ukrainase”, citojnë mediat franceze raportet e Pallatit Élysée.
Kievi prej kohësh u kërkon aleatëve të tij tanke luftarake dhe transportues të blinduar të personelit të stilit perëndimor. Gjermania deri më tani ka refuzuar të furnizojë Ukrainën me tanke luftarake, përfshirë tanket, tip ”Leopard 2” të Bundeswehr-it. Gjatë një vizite të presidentit ukrainas Volodymyr Zelensky në SHBA, Uashingtoni gjithashtu u zotua t’i sigurojë Ukrainës një sistem të mbrojtjes ajrore ”Patriot”.
