Kanceri i gjirit ka shënuar rritje nga viti në vit. 224 gra humbën jetën nga kanceri gjatë vitit të kaluar, ndërsa u regjistruan 805 raste të reja.
“Për vitin 2024, bazuar në Regjistrin Kombëtar të Kancerit, janë regjistruar 805 raste të reja me kancer gjiri. Është një incidencë që gjatë 10-vjeçarit të fundit ka ardhur gradualisht në rritje dhe është rritur me 2.1% çdo vit, kjo falë ndërgjegjësimit të grave dhe vajzave. Vdekshmëria është stacionare, madje gjatë vitit të fundit vërehet një rënie e lehtë nga kanceri i gjirit nga viti 2015–2024. Në vitin 2024 kanë ndërruar jetë 224 gra nga kanceri i gjirit. Janë 10 raste me kancer të gjirit te meshkujt; sigurisht prek edhe meshkujt, por shumë më rrallë se sa femrat.”
Drejtoresha e ISHP, Dorina Toci, thotë se fatmirësisht vitet e fundit është shënuar një rënie e incidencës së kancerit të gjirit te moshat e reja.
“Nuk kemi rritje të kancerit të gjirit te moshat e reja, madje kemi një ulje të lehtë të incidencës së kancerit te moshat nën 50 vjeç, dhe rreziku rritet me moshën. Grupmosha më e riskuar është 50–70 vjeç.”
Nëpërmjet mamografive depistuese, të cilat kryhen në të gjitha spitalet rajonale të vendit, gratë mund të parandalojnë në faza të hershme kancerin e gjirit.
“Kryhen në vit rreth 5,000 mamografi depistuese nëpërmjet njësive të lëvizshme të mamografive dhe në total kryhen 25,000 depistime me mamografi. Mamografitë lëvizëse dhe stacionare janë një shërbim që ofrohet falas për të gjitha gratë. Gratë mund ta marrin këtë shërbim në spitalet rajonale të vendit, në poliklinikat në Tiranë, në ‘Mbretëresha Geraldinë’ dhe në QSUT.”
Kanceri i gjirit mbetet shkaku kryesor i vdekjeve te gratë dhe më i shpeshti që diagnostikohet në mbarë botën, por ndërgjegjësimi dhe kontrolli i hershëm mund të shpëtojnë jetë.
/vizionplus.tv
