Kryeministrja e Serbisë, Ana Bërnabicc, ka deklaruar se nuk pret lajme tw mira nga fakti se gjykatat e Kosovës kanë marrë përsipër rastet e krimeve të luftës, me të cilat deri më tash është marrë misioni evropian për sundimin e ligjit – EULEX.
“Nuk pres ndonjë gjë të mirë derisa Prishtina ka udhëheqës politikë që ua mohojnë serbëve të drejtat e njeriut.”
Në kuadër të sistemit të drejtësisë në Kosovë është themeluar një departament i veçantë, i cili do t’i trajtojë rastet e krimeve të luftës. Zyrtarë nga Prokuroria Speciale e Kosovës kanë konfirmuar për Radion Evropa e Lirë se në këtë departament tashmë janë duke punuar tre prokurorë.
Prokuroria Speciale e Kosovës i ka marrë kompetencat ekskluzive në qershor të vitit 2018 për t’i hetuar dhe ndjekur krimet e luftës dhe shkeljet e tjera të së drejtës humanitare ndërkombëtare.
Bërnabicc tha se ka kërkuar nga përfaqësuesit e Organizatës për Siguri dhe Bashkëpunim në Evropë të reagojnë, sepse, siç tha ajo, serbët në Kosovë janë privuar nga e drejta për informim.
