Kryeministrja e Serbisë, Ana Bërnabiç, është shprehur se nuk sheh asnjë shenjë të arritjes së kompromisit me Kosovën, por sipas saj ai duhet të arrihet nëse Serbia dëshiron të anëtarësohet në Bashkimin Evropian.
Bërnabiç në një intervistë për mediat serbe është shprehur se Beogradi dhe Prishtina janë gjithnjë e më larg arritjes së kompromisit, para së gjithash për shkak të taksës 100% që Kosova u ka vënë importeve nga Serbia, si dhe për shkak të formimit të ushtrisë së Kosovës.
“Unë mendoj se ne po largohemi nga kompromisi”.
Por, ajo shtoi se konflikti i ngrirë me Prishtinën nënkupton që Serbia nuk mund të bëhet anëtare e BE-së.
Gjithashtu në fjalën e saj Bërnabiç tha se “çështja e Kosovës duhet të zgjidhet” dhe se zgjidhja është “arritja e një kompromisi që do të garantonte paqe, stabilitet dhe jetë më të mirë për serbët në Kosovë”.
Ajo ndër të tjera ka thënë se Serbia është në “pozitë të shkëlqyeshme” sepse kryenegociator i saj është presidenti i shtetit, Aleksandar Vuçiç, por shtoi se Qeveria e Serbisë do të ndihmojë aq sa mundet.
Dialogu për normalizimin e marrëdhënieve midis Kosovës dhe Serbisë po ndërmjetësohet nga Bashkimi Evropian.
