Vota e votuesve italianë e ka vështirësuar mundësinë e formimit të qeverisë së re. Pas pashkëve, presidenti i republikës Sergio Mattarella, pritet të nisë konsultimet për të vendosur se cili do të jetë kryeministri i ri i vendit. Por kreu i Lëvizjes 5 Yjet, Luigi Di Maio tha para mijëra simpatizantëve se zgjedhjet e së dielës i dhanë një mesazh shumë të qartë të gjitha forcave të tjera politike.
“Ne jemi forca e vetme politike që kemi fituar këto zgjedhje, na takon të qeverisim e se pa ne në qeveri, legjislatura e re vështirë që të nis punën. Ne jemi të hapur e të gatshëm për të dialoguar me të gjitha forcat e tjera politike. Ne duam të qeverisim e do të ndjekim të gjitha procedurat institucionale për të pasur drejtimin e vendit.”
Nga ana tjetër lideri i koalicionit të qendrës së djathtë dhe i Partisë Forza Italia, Silvio Berlusconi, shprehet se kreu i shtetit do të bëjë një zgjedhje të drejtë, duke ia dhënë mundësinë për formimin e qeverisë së re qendrës së djathtë.
“Koalicioni ynë është fituesi politik i këtyre zgjidhjeve. Gjithçka është tani në duart e kreut të shtetit e varet nga urtësia e tij” u shpreh Berluskoni. Ai siguroi se do ta mbështesë Matteo Salvinin si kandidat për kryeministër, dhe do t’i japë pa hezitim kreut të “Lega Nord” mbështetjen në përpjekjet për formimin e ekzekutivit të ri.
Të dyja palët kanë nisur të shohin me interes votat e Partisë Demokratike, lideri i së cilës Matteo Renzi, dha dorëheqjen deri në formimin e qeverisë së re, duke ndezur debatin e brendshëm për të ardhmen e partisë.
Nga ana tjetër, Brukseli pret qe presidenti Italian të japë vendimin e duhur.
