Kryetari i Partisë Demokratike, Sali Berisha, i ka cilësuar të turpshme deklaratat që shoqëruan procesin e zgjedhjes së drejtuesit të prokurorisë së posaçme.
Gjatë një konference me gazetarët, Berisha akuzoi kryeministrin Edi Rama dhe ambasadoren amerikane në Tiranë, Yuri Kim, se po ndërhyjnë ne një sistem që duhet të jetë i pavarur.
SALI BERISHA
KRYETAR I PD
“Kurre ne histori nuk mund te gjeni nje beteje te turpshme, midis nje kryeministri dhe nje ambasadori qe ne ligj nuk kane asnje lidhje me kreun e Spak-ut. “
Kryetari i PD ka akuzuar ambasadoren amerikane Yuri Kim se po sillet si guvernatore edhe në rastin e zgjedhjes së drejtuesit të SPAK.
“Çfarë kujtoni se mbron ajo? Mbron në minumim dështimin e reformës së Sorosit në Shqipëri. Ajo mbron veten sepse ka përdorur korrupsionin për të luftuar antikorrupsionin në Shqipëri.”
Ndërsa kryeministri Edi Rama, sipas kryetarit tëPD synon të ndërhyje në SPAK për çështjen e inceneratoreve.
“Ç’punë ka një kryeministër se kush emërohet në krye të SPAK-ut? Ka vetëm dosjen e tij, sepse dosja e djegësave është dosje e një organizate kriminale, në të cilën ka firmosur Edi Rama.”
Por vetë Partia Demokratike nuk ka asnjë të preferuar për drejtuesin e SPAK.
“Dumani apo Kondili eshte si te thuash Taulanti apo Damiani”
Berisha ka përsëritur akuzën se prokuroria e posaçme ndodhet nën kontrollin e qeverisë, duke e ilustruar këtë me hetimin për tragjedinë e Gërdecit.
“Të thërrasësh Aldo Bumçin për një falsifikim të bërë, të faktuar që është falsifikim, vetëm se gjoja po heton Sali Berishën dhe djalin e tij. Ky është nj turp kombëtar.”
Gjatë konferencës për gazetarët Berisha akuzoi kryeministrin Rama edhe në lidhje me shefin e shërbimit sekret Helidon Bendo. Sipas Berishës, Bendo është kthyer pas studimeve në SHBA, por nuk i lejohet të hyjë në ambientet e SHISH dhe të marrë detyrën.
