Kreu i “Foltores”, Sali Berisha ka prezantuar këtë të mërkurë kandidatin e tij për për Bashkinë Divjakë, Aurel Malkon. Gjatë fjalës së tij, Berisha ka vijuar akuzat ndaj qeverisë të cilën e akuzon për varfërim të qytetarëve.
Ai theksoi se rritja e çmimeve ka thelluar hendekun ekonomik në vend, nga i cili preken drejtpërdrejtë qytetarët. Në të njëjtën kohë, Berisha krahasoi dhe situatën aktuale të Bashkisë Divjakë me atë gjatë kohës kur ai ishte në pushtet.
Ai deklaroi se shqiptarët po largohen për shkak të rrogave të ulta.
“Ne ja dolëm ju të jemi të mëkëmbur, por të kemi në varfëri në largim, të jemi në një ngjitje të vërtetë. Dhe kjo çfarë solli? Kjo solli që nga 2007-2014 numri i banorëve në Divjakë, numri i banorëve në tërë Shqipërinë u rrit nga viti në vit. U shtua besimi tek shqiptarët se jeta ndërtohet dhe e ardhmja ndërtohet në Divjakë, Lushnje, në Shqipëri dhe Shqipëria pra po ecte, po ngjitej.
E kundërta, u përmbys pas konsolidimit të pushtetit të rilindjes. Erdhi një grup i cili varfëroi shqiptarët.
Tani do të mendojmë për një moment. Në 2013 thashë nuk ishim të mëkëmbur, por ne qëndronim këtu, ne lëviznim lirshëm, por popullata rritej, sepse kishte një besim, kishte një optimizëm. Kurse sot rrogat janë këto që i dini, megjithatë varfëria është e frikshme, varfëria është në rritje, ndaj dhe njerëzit ikin.
Problemi numër 1 i shqiptarëve është problemi ekonomik.
Po pse thoni ju, çfarë ndodh sot. Sepse sot nga 2013 gjer këtë vit, çmimet janë rritur nga viti në vit. Vetëm me rritjen e çmimeve nga viti 2021-2022, çdo njëri prej jush ka humbur 430 mijë lekë, sipas ekspertëve. Imagjinoni, pra ka humbur pothuajse një rrogë, në një kohë kur ai që shëtit me avion personal dhe dhomë gjumi, shëtit gjithë botën, kishte premtuar për ju rrogën e 13, pensionin e 13. Tani faktikisht merrni 11 rroga, 11 pensione, kjo është e vërteta”, tha ai.
