Kreu i Partisë Demokratike, Sali Berisha gjatë mbledhjes së grupit parlamentar të PD-së ka përshëndetur amrëpushmin dy-javor të arritur mes SHBA-së dhe Iranit. Në fjalën e tij ai tha se uron që ky armëpushim të shndërrohet në një marrëveshje paqeje të qëndrueshme për vendet dhe popujt e këtij rajoni.
Berisha: Së pari, shpreh vlerësimin tim, tonin, të PD dhe opozitës për armëpushimin e arritur në luftën në Gjirin Persik midis SHBA, Izraelit dhe Iranit.
Le të urojmë që ky armëpushim të shndërrohet në një marrëveshje paqeje të qëndrueshme për vendet dhe popujt e këtij rajoni, rajoni siç faktohet i një rëndësie strategjike dhe nevralgjike për energjinë e botës.
Shtetet e Bashkuara dhe Irani ranë dakord për një armëpushim dy-javor, pak para se të skadonte afati i dhënë nga Donald Trump për Ngushticën e Hormuzit.
Teherani pranoi të rihapë përkohësisht Ngushticën e Hormuzit, ndërsa Shtëpia e Bardhë konfirmoi pjesëmarrjen e Izraelit. Arritja e armëpushmit erdhi pas bisedimeve me udhëheqjen e Pakistanit.
Sipas marrëveshjes, kalimi i sigurt do të koordinohet me Iranin dhe Omanin që do të lejohen të ngarkojnë tarifa tranziti për anijet që kalojnë. Teherani planifikon t’i përdorë të ardhurat për rindërtimin pas luftës.
Bisedimet do të fillojnë të premten në Islamabad, ndërsa plani me 10 pika i ndërmjetësuar nga kryeministri i Pakistanit përfshin heqjen e sanksioneve, krijimin e një fondi për humbjet e luftës, një tërheqje të trupave amerikane nga Gjiri dhe njohjen e të drejtës së Iranit për të pasuruar uranium në këmbim të një premtimi për të mos ndërtuar armë bërthamore.
Izraeli mbështet armëpushimin me kufizime sepse zyra e kryeministrit Benjamin Netanyahu theksoi se armëpushimi nuk e përfshin Libanin.
