Kreu i Partisë Demokratike, Sali Berisha në një konferencë me gazetarët ditën e sotme ka komentuar protestën e zhvilluar të dielën, 22 mars nga opozita.
Berisha tha kjo lëvizje qytetare është një mesazh i qartë për qeverinë.
“Çdo përpjekje për të shtypur zërin e popullit do të jetë e dështuar. Shqiptarët dje treguan se janë të vendosur, të bashkuar dhe të pamposhtur,” deklaroi ai.
Kreu i PD theksoi gjithashtu se opozita do të vijojë mobilizimin e saj në të gjithë territorin, duke u angazhuar në aktivitete paqësore dhe duke kërkuar ndryshimin e menjëhershëm të politikave të qeverisë.
Berisha: Qytetarët e Tiranës dhe mbarë Shqipërisë nderuan në mënyrën më madhështore, më solemne, më dinjitoze 22 marsin, ditën e parë të demokracisë me demonstratën e tyre të fuqishme në kushtet e një narkodiktature, autokracie elektorale apo diktaturë autoritare, shqiptarët treguan dje se janë të pamposhtur nga kjo narkodiktaturë. Mendoj se me protestën e tyre përfaqësuan revoltën, zemërimin e një kombi të tërë.
Kurrë ndonjëherë më e fuqishme kryengritja paqësore e shqiptarëve se sa dje nuk ka qenë në rrugët e Tiranës. Mesazhi është i qartë, në Shqipëri në kushtet e autokracisë të sundimit të Edi Ramës, nuk ka dhe nuk mund të ketë paqe dhe stabilitet. Beteja jonë do të njohë vetëm ngjitje.
Ajo do përfshijë të gjithë Shqipërinë dhe do jetë e pandërprerë gjer në largimin përfundimtar të kësaj organizate kriminale me në krye Edi Ramën. Ndaj dhe unë kam një mirënjohje të pakufishme për të gjithë ata dhjetëra mijëra qytetarë që mbushën dje rrugët dhe bulevardet e Tiranës dhe protestuan në mënyrë dinjitoze. Shprehën zemërimin e tyre ndaj këtij regjimi./vizionplus.tv
