Kryedemokrati Sali Berisha zhvilloi mbrëmjen e kësaj të premteje një takim me banorët e njësisë katër në Tiranë ku prezantoi kandidatët e “Aleancës për Shqipërinë Madhështore”.
Gjatë fjalës së tij Berisha theksoi se PD dhe kolaicioni kanë mbështetjen më të madhe të qytetarëve shqiptarë në zgjedhjet e 11 majit.
Ai gjithashtu premtoi se pas 11 majit do të vendoset minimumi jetik 200 euro, si dhe do të ketë rritje të pensioneve.
“Ne kemi një epërsi të madhe ndaj kundërshtarit tonë, kemi një mbështetje të fuqishme, entuziazëm të pa parë më parë, një program i cili në të vërtetë çdo orë e ditë, po pushton mendjen dhe zemrat e qindra shqiptarëve. Ky program, ka si qëllim kryesor një mundësi të re për çdo shqiptarë, nga fëmijët për një shkollë më të mirë, te pensionistët për një jetë më të mirë. Tek të rinjtë për shanse shkollimi dhe punësimi reale, te bizneset për shanse suksesi, tek punonjësit për vlerësim dhe respekt të punës së tyre. Ka para së gjithash rikthimin e parave te qytetarët. Ne në 100 ditët e para, do të realizojmë atë ndryshim të cilin nuk e ka menduar asnjë njeri këtu, do vendosim minimumin jetik 200 euro për çdo pensionit, çdo qytetar në ndihmë ekonomike, të papunë, jetim, student me bursë”, tha Berisha.
