Kuvendi i Shqipërisë, përmes një njoftimi zyrtar ka bërë të ditur arsyen pse Sali Berisha është lënë jashtë Grupit Parlamentar të PD-së, pas kërkesës së Gazment Bardhi që revokoi të gjithë masat disiplinore.
Kuvendi thekson se Berisha nuk ka qenë anëtar i grupit të PD që prej nisjes së legjislaturës. Me kërkesë të Bardhit në grup janë kthyer të gjithë deputetët që kanë qenë anëtarë të grupit të PD që prej nisjes së legjislaturës më 10 shtator.
“Në datën 9 prill 2024 Kuvendi është njoftuar nga z. Gazment Bardhi mbi “Revokimin e të gjitha vendimeve për masa disiplinore të marra nga grupi gjatë kësaj legjislature.” Deputeti Sali Berisha, prej fillimit të legjislaturës, nuk ka qenë anëtar i Grupit Parlamentar të Partisë Demokratike.
Lideri i opozitës, Sali Berisha ka mbetur zyrtarish jashtë Grupit Parlamentar të PD. Edhe pse shumica e deputetëve demokratë vendosën që ish-kryeministri të jetë pjesë e grupit, kjo nuk u reflektua në faqen zyrtare të Kuvendit.
Sqarimi i Kuvendit lë pa përgjigje një pjesë të shkresës së Gazment Bardhit. Bardhi kërkoi që në grupin parlamentar të PD-së të hyjnë të gjithë ata deputetë që në fillim të legjislaturës janë deklaruar si deputetë të PD. Kjo pikë është vendosur pikërisht për të garantuar futjen e Berishës në grupin e PD, pasi ish-kryeministri ka deklaruar se është deputet i PD.
Burime pranë grupit parlamentar të PD bëjnë me dije se do të kërkojnë sërish nga kryetarja e Kuvendit të kthejë Berishën në grupin parlamentar të PD
Të gjithë deputetët e tjerë të përjashtuar në dy vite, u rikthyen në grupin e PD-së, ndërsa Berisha vijon të figurojë deputet i pavarur./vizionplus.tv
