Kreu i Partisë Demokratike Sali Berisha është shprehur se dënon me forcën më të madhe tenderat korruptivë të qeverisë në fushën dixhitale.
Në bashkëbisedimin e përjavshëm me gazetarët, Berisha tha se përpjekjet për të ndërhyrë në Kosovë kanë qenë të mëdha, por mbrojtja e tyre ka shkëlqyer dhe nuk ka lejuar penetrimin në këto sisteme.
“Dënoj me forcën më të madhe, tenderat korruptivë të ndërtimit dhe mbrojtjes së këtyre sistemeve. Përpjekjet për të ndërhyrë në Kosovë kanë qenë të mëdha, por mbrojtja e tyre ka shkëlqyer dhe nuk ka lejuar penetrimin në këto sisteme.
200 milionë euro të shpenzuara në Shqipëri kanë përfunduar në xhepat e Gjelishtëve, Beqëve dhe baxhanakëve me shokë dhe nuk kanë përfunduar në teknologjitë mbrojtëse.
Përpjekjet për të fajësuar kompaninë amerikane, janë përpjekje për të fshehur vjedhjet që janë bërë.
Në këtë kontekst, i bëj thirrje NATO-s, SHBA, me një ekip të gjithanshëm, të ndihmojnë Shqipërinë për të kapërcyer këtë agresion, duke shqyrtuar të gjithë situatën e sistemeve dixhitale në Shqipëri”, tha Berisha.
