Drejtuesit e Forumit Rinor të Partisë Demokratike i janë bashkuar Sali Berishës duke kërkuar largimin e Lulzim Bashës nga posti i Kryetarit të PD. Para të rinjve demokratë, Berisha ka akuzuar Bashën se në shenjë hakmarrjeje po sulmon forumin rinor dhe forumin e gruas, duke sjellë në vëmendje se u takon të rinjve të zhvillojnë procesin zgjedhor, pasi FRPD nuk është pronë e askujt.
“Basha duhet të ishte këtu në një debat të hapur, por i kyçur në zyrën e vet jep urdhra me telefon për uzurpimin e FRPD e forumit gruas. Kryetari pa parti e ka kapur një frikë e madhe nga ju të rinjtë e PD-së, Është krejtësisht i pashpresë. Edhe një herë ju sugjeroj ta ftoni në një debat, të mos fshihet të dalë ballë për ballë dhe të mësoj nga ju ABC e demokracisë. PO sillet si kur është shkolluar në Korenë e Veriut dhe jo në Holandë.”
Berisha ka sjellë në vëmendje listat e kandidatëve për deputet kur Lulzim Basha nuk vendosi asnjë përfaqësues të forumit.
“Belind Këlliçit iu mohua mundësia për t’ju përfaqësuar në parlament, jua them unë se ai pati frikë se e shikonte Këlliçin si rrezik potencial për t’i zënë vendin.”
Të rinjtë e forumit i janë bashkuara Sali Berishës duke kërkuar largimin e Lulzim Bashës nga drejtimi i Partisë Demokratike.
BELIND KËLLIÇI
KRYETAR I FRPD
“Kushdo që tenton të vërë një shenjë barazie mes atij që ka rrëzuar komunizmin dhe atyre që janë shpallur non grata dhe janë krah Ramës e kanë shumë gabim.”
GRIGLES MUÇOLLARI
SEKRETAR I PËRGJITHSHMË I FRPD
“Jepi fund marrëzisë, jepi fund një minutë e më parë. Çdo minutë e jotja i jep oksigjen korrupsionit, dhe Ramës, jep dorëheqjen”
Ish-kryeministri ka shpjeguar se Basha do të shkarkohet në 11 dhjetor dhe vendimi do t’i çohet për votim edhe anëtarësisë.
Dy ditë para se forumi rinor të rreshtohej në krah të Sali Berishës, Lulzim Basha vendosi të shpallë organizimin e zgjedhjeve të reja për të rinjtë dhe per forumin e gruas por të dyja këto organizata partnere e kanë cilësuar “nul” vendimin e kryetarit të PD.
