Kanë dalë detaje të reja nga ekzekutimi i ish-policit Gentjan Bejtja. Burime për Vizion Plus bëjnë me dije se ndaj Bejtjas është qëlluar me kallashnikov, ndërsa ai ndodhej në magazinën pranë banesës së tij në Larushk të Fushë Krujës..
Në momentin e ngjarjes në banesë ka qenë edhe bashkëshortja e Bejtjas. Pas ngjarjes policia ka gjetur edhe një makinë të djegur pranë fshatit Hasanaj, e cila dyshohet se është përdorur nga autorët pas ngjarjes.
Lexo edhe :
Related Posts
Gazetari i Vizion Plus Esido Barkaj bën me dije se makina e djegur që dyshohet se i përkiste autorëve është ende duke u djegur dhe efektivët nuk kanë mundur akoma për momentin që t’a kqyrin nëse ka armë brenda saj apo jo. Mjeti është një fuoristradë e bardhë, ndërkohë po verifikohet nëse ka qenë e denoncuar më herët si e vjedhur apo jo.
Menjëherë pas ngjarjes ka reaguar edhe policia, e cila thekson se autorët e krimit ende nuk janë identifikuar. Ndërkohë mësohet se drejt vendngjarjes kanë shkuar edhe forcat RENEA.
Njoftimi:
Më datë 15.03.2024, në fshatin Larushk, Krujë, nga persona ende të paidentifikuar është vrarë me armë zjarri shtetasi G. B.
Një grup i posaçëm hetimor, nën drejtimin e Prokurorisë, vazhdon punën për sqarimin e rrethanave të ngjarjes, identifikimin dhe kapjen e autorëve të dyshuar.
Atentatet e mëparshme
Kujtojmë që ky është atentati i katërt që i bëhet Bejtjas. Kujtojmë që më 4 korrik 2023, Bejtja i shpëtoi plumbave, por kunati i tij, vëllai i gruas. Ramazan Sino humbi jetën.
Ndërsa dy fëmijët e Bejtjas, 13 dhe 8 vjeç mbetën të plagosur.
Në 9 janar të vitit 2022 Gentian Bejtja ish polic burgu, i shpëtoi një atentati me breshëri kallashnikovi, në afërsi të Niklës në Fushë-Krujë, por u plagos në krah miku i tij 31 vjeçar Klodian Stafuka i cili ndodhej me të në makinë gjatë momentit kur ndaluan për të furnizuar makinën në një pikë karburanti.
Kjo ngjarje akoma nuk është zbardhur. Bejtja ishte njëri nga njerëzit që piu kafe me Enver Stafukën, pak minuta para se ky të rrëmbehej dhe të zhdukej në mes të Fushë-Krujës, natën 8 shkurtit 2015.
I njohur si ish-mik i Durim Bamit, person me rrezikshmëri të lartë shoqërore, 42-vjeçari Gentjan Bejtja ka qenë i dyshuar për një seri ngjarjesh në zonën e Fushë-Krujës, por jo vetëm.
Në shtator të vitit 2016, ndaj tij u bë një atentat me tritol. Bejtja po udhëtonte me makinën e tij tip “Tuareg”, në fshatin Nikël të Krujës, kur nga poshtë mjetit shpërtheu eksplozivi që e dëmtoi rëndë në këmbë.
42 vjeçari, u përmend shumë si personi i cili dyshohet që së bashku me Enver Stafukën kishin vjedhur makinën me të cilën u krye vrasja e kryekomisar Dritan Lamajt 24 shkurt 2013. Por me vendim gjykate Betja dhe Stafuka u shpallën të pafajshëm me 13 nëntor 2013, pasi u vlerësua se nuk kishte prova të mjaftueshme për dënimin e tyre për akuzën e vjedhjes në bashkëpunim.
Gentian Bejtja është shoqëruar edhe për dy atentate, atë të vrasjes së Ilias Çalit në autostradën Tiranë-Durrës, në prill të 2022-it dhe atentatit ndaj Marklen Hakës në qershor po të vitit të shkuar, por nuk u gjetën prova për ta fajësuar si autor të dyshuar.
