Ministri i brendshëm Saimir Tahiri kërkoi nga të rinjtë që të kontribuojnë për policinë, duke u bërë pjesë e saj por vullnetarisht. Gjatë konferencës për Akademinë e Sigurisë, ministri i brendshëm tha se të gjithë duhet ta shohin veten ne anën e mbështetësve te uniformave blu me qellim rritjen e sigurisë.
“Kualifikimi është investimi më i madh që mund të bëjmë për sot dhe për nesër. Sfidat janë të shumta dhe më shumë sesa muskuj kërkojnë mendje dhe dije, edukim. Edhe punonjësi i policisë vullnetar do ketë mundësi të krijojë vetë bindjen mbi punën që bën sot Policia e Shtetit në përpjekjen tonë të përbashkët për të pasur më shumë siguri. Është shumë e domosdoshme që kjo hapësirë të jetë e gjitha për t’u eksperimentuar. Nesër mund të jenë të rinj që duan t’i bashkohen Policisë së Shtetit që të jenë pjesë e trupës, por mund të jenë të rinj që janë të realizuar në profesionet e tyre dhe duan që dy orë t’i shpenzojnë bashkë me policinë në detyrat që kryen policia në ndihmë të qytetarëve.”
Tahiri shtoi se kjo është një praktikë e vendeve të Bashkimit Evropian, ndërsa vullnetarët më pas mund të rekrutohen në polici. Gjatë konferencës ministri i brendshëm theksoi se sipas sondazheve, policia është institucioni më i besueshëm dhe pikë referimi kur shkelet ligji.
